A publicación dos Orzamentos no Dog de hoxe pon fin aos recortes discriminatorios efectuados nas nosas nóminas desde o ano 2013.
A aplicación da devolución dos nosos dereitos en nómina ten carácter retroactivo a xaneiro deste ano, vemos un pouco xusto de tempo a súa aplicación na nómina deste mes pero non se descarta.
Agora só nos queda a publicación dos Orzamentos Xerais do Estado para que nos incrementen na nómina o «escaso» 1% prometido.
DESTACA OS SEGUINTES ARTIGOS NO DOG:
ARTIGO.- 11.2. No ano 2017 as retribucións do persoal ao servizo do sector público autonómico non poderán experimentar ningún incremento con respecto ás vixentes o 31 de decembro de 2016, en termos de homoxeneidade para os dous períodos da comparación, tanto polo que respecta a efectivos de persoal como á súa antigüidade. Sen prexuízo do anterior e do establecido na disposición adicional décimo cuarta desta lei, recuperaranse os conceptos retributivos minorados como consecuencia do axuste retributivo recollido na Lei 12/2015, do 24 de decembro, de orzamentos xerais da Comunidade Autónoma de Galicia para o ano 2016.
ARTIGO.- 23. Retribucións do persoal dos corpos de funcionarios ao servizo da Administración de xustiza
Un. O persoal funcionario dos corpos ao servizo da Administración de xustiza que desempeñe as súas funcións no ámbito competencial da Comunidade Autónoma de Galicia percibirá as retribucións previstas na Lei de orzamentos xerais do Estado para o ano 2017 e na demais normativa que lle sexa aplicable.
Dous. Os complementos e as melloras retributivas reguladas nas disposicións ou nos acordos adoptados polos órganos da Comunidade Autónoma no exercicio das súas competencias verbo deste persoal non experimentarán incremento respecto das vixentes o 31 de decembro de 2016, sen prexuízo do establecido no punto Dous do artigo 11 desta lei.
